KUCHING: Nengah ‘Program Peningkatan Enterprise Bumiputera’ (BEEP), 12 buah kompeni dagang mit enggau jelan pemesai (PKS) di menua tu udah nerima geran sepenyampau RM2.56 juta.
Ketuai Eksekutif SME Corporation Malaysia (SME Corp), Datuk Hafsah Hashim madahka geran nya antara 50 peratus ari penyampau kos projek ke udah dikemendarka.
“Antara projek ke deka digaga orang dagang BEEP nyengkaum kena meli injin sereta perengka guna, pengawa mungkus produk sereta ngelaku produk sereta ngemanahka agi endur kompeni.
“Tu mega nyadi peransang ngagai orang dagang ngemantupka pengingin ati ngemanahka dagang sida,” ku iya.
Iya madah munyi nya lebuh bejaku ba atur pengawa bejadika Licha Mayar PKS sereta Nyerahka Surat Bulih Geran Program Peningkatan Enterprise Bumiputera di Bilik Santubong, Ringkat 1, Begunan Bank Negara, ditu, ensanus.
Sama bisi enggau ngulu atur pengawa nya kemari, Menteri Muda Pemansang Pengawa Orang Dagang Bumiputera (Opis Kepala Menteri) ke mega Chalun sitak Gedong, Datuk Mohd Naroden Majais.
Ku iya, pengawa meri geran nya dikearapka nyadi peransang ngagai orang dagang Bumiputera menua tu, ngambika ulih nambah penguntung kompeni sida.
“Nengah pengawa ke baka tu, nya ulih mantu nyungkak ekonomi menua ngambika maju agi, kelebih agi ba dunya ke majak ngerembai maju diatu,” ku iya.
Ba atur pengawa nya mega, SME Online Business Sdn Bhd mega bisi ngepunka Sarawak SME Online Niaga ke nyadi portal dagang ngagai orang dagang di menua tu.
Pengawa ngangkatka dagang ‘online’ nya mega diperatika ulih mantu orang dagang mantaika produk sida kelimpah ny aup ngerembaika dagang sida ngagai renggat ke besai agi.
Nengah pemansang ke baka tu, SME Corp bulih urung RM30 juta (2016) ke alai RM4 juta diungkup ngagai BEEP Sarawak.
Read more: http://www.theborneopost.com/2016/04/24/rm2-56-juta-diungkup-ngagai-pks-nengah-beep/#ixzz46v0uqA2y
